احيانا بتاخدنا الدنيا
فنتوه ف سكك كت عرفانا
خطاوينا تخاصم خطاوينا
ارواحنا ما تبقاش جوانا
سؤلات ياما من غير اجابات
و دموع و اهات مش رحمانا
و جرينا كتير و بقينا مشاوير
بتاخدنا نروح و ما نرجعشى
و ننادى على نفوس ساكنانا
تهرب و تكون ما بتسمعشى
و نقابل ناس من غير احساس
و نعيش فى الوهم المتقدر
تسود قلوب ... فتخاف ل تتوب
تدبل مشاعرنا و تتكسر
و بنرضى نكون .. خيالات و ظنون
و كلام متذوق بنقوله
و نهار كداب محدود بحساب
ورا ليل موجوع عمر بطوله
و ايام بتفوت .. مليانة سكوت
و عيون بتخاف تبقى جريئة
و ندوس على احلا حاجات فينا
فنموت ميت ضحكة بريئة
و ان فوقنا ف يوم او فكرنا
بنلاقى سنينا بتسبقنا
و العمر عشان ما احناش اصحاب
ما بقاش بصراحة مصدقنا
فنشوف فات كام
و الفاضل كام
نلاقينا من الموت قربنا
فنخاف نشتاق .. فنعيش ف فراق
و نكون جوانا اتغربنا
فنسك بيبان كت واسعة زمان
نغرق فى وجعنا و نستنى
و ما يبقاش فينا حاجات تتعاش
و لا نعرف نرجع نتمنى
ليست هناك تعليقات:
إرسال تعليق