مربعاتي .. حياتي بقلم معوض حلمي

( مربعاتي .. حياتي )
 ~~~~~~~~~~~~~~~

( غيرة حبيبتي )

~~~~~~~~~~~~~
ع الخد .. غمازتين
ف الحسن آيه وموهبه
رمتني بنظرة عين
ونظرة عينيها مرعبه
وانا بس مخضوض حبتين
درجة حرارتي  ملهلبه

لملميني ف حضن حضنك ف الدفا
دوبيني جوا قلبك ف الأمان
هتلاقيني نبع صافي للوفا
وحضن يحميكي ويلات  الزمان

البت سايقه دلالها
سقياني مري دوايا
وانا اللي طالب وصالها
حويت ياجي ميت حوايا
عشان لما تاجي أشيلها
ف نن عيني  وحشايا

باغزل ف حبك قماشي
محتاج ياحلوه لمقاسك
هواكي جاي ولا ماشي
دليني على أهلك وناسك
ردك مسافر ماجاشي
 وانا قلبي ف هواكي ناسك

محبوب وفايق بطبعي
مشكلتك انك عبوسه
مطلوب ياحلوه تحني
وتفارقي زمن العنوسه
وتبقى حلالي ياستي
 ف الكوشه جنبي عروسه

بيقولوا عليا ان انا مبخوت
وانا شايف ب عنيا الموت
والعمل اللي شربته ف كاسي
مربوط على سن  الحوت

غيرة حبيبتي محيراني
ظلماني آآآه ومخلياني
زي تور داير ف ساقيه
 على راسي ناف والغومه عمياني

حبيبتي ووحي إلهامي
لو تبقي حبل إعدامي
هاقولها ونيتي صافيه
أموت وفداكي  أيامي

بيقولوا عليا اني شجيع
وانا من نظرة عينك اضيع
ورهنت الأحلام علشانك
وعاملك توكيل  بالبيع

وانا أصلي حنين ووديع
وماليش ف اللف وف التمييع
أنا دوغري ودايب ف غرامك
أنا شاري ومش ممكن  ابيع

أنا دوغري ودايب ف غرامك
أنا شاري ومش ممكن  ابيع

~~~~~~~~~~~~~
بقلمي .......
معوض حلمي
منشأة بطاش
تمي الأمديد
 دقهلية