------------------------------------- نشرت هذه القصيدة في ديوان (جغرافيا الاحلام)
على فكرة
ــــــــــــــــــــــــــــــــــــــــ
يدهشنى فيكى
غنا مزمارك البلدى
ونثر الشعر قوافيكى
قصايد قايله حدوته.. توته
غرام يازهر ف عنيكى
كما الانغام
كلام الوان
كلام موزون
ولسه الحنه مرصعه
مطبعه ف ايديكى
عبير البحر بلسم
لساها روايحه فيكى
اشوف المبهرات طلات
بينزل قمرى يلاغيكى
ويطلع للقوافى لسان
كلام اوزان
يقول فيكى
وميل السيسبان دا غرام
وريحه البرتقان فيكى
يشكل القمر وشك
يندى المطر قلبك
اشوف الليل شموع
قناديل بتلمس خدك
وتجدل شعر عرايس حور
تضفر شعرها ف شعرك
جدايل نور
واشوف الليل يغنيلك
يغنيلك على عوده
ويتفجر كما زمزم.. يوضيكى
وتفضل المستكه ريحتها ف ايديكى
وتفضل المدهشات احلام
شجر وعيدان
ريحتها تنها فيكى
سؤال ف سؤال
امانى راكبه سفن الوان
خضار واشجار
امانى حاضنه سواقيكى
وانا حتما شايفلك رؤيه ف منامى
حصان ابيض على السكه
ف الفجريه مستنيكى
ما انا عاشق شوارعك
وميادينك وحواريكى
ويبقى سؤال بعد سؤال
اقرب .. اشم ريحان
اشوف النيل زهراوى
عرايس متعلقه ف مرجان
بتغسل شعرها الذهبى
بشمع النحل
وتركب مراكب ملوك الجان
وتدهن جسمها الوان
وتتنفس بنفسج
وتستنشق .. زعفران
وترجع تانى ترسملك صورك
ملامح وشك الطيب
شعب مرجان
وتتشكل مواكب نور من حسنك
ولسه بقايا احلام على شطك
تروح ليام
وتيجى ايام
ووشك هو نفس الوش
خلية نحل
ملامح نخل
ولون البحر زهر
فصيل البرتقان
وتبقى ملامحك الفجريه متوضيه
كما الريحان
اقرب اشم ريحه الشط
تلميذات شايله .. شنط الوعد
ولسه الامنيات فكرة
ماسكه بايدين اطفال
متعلقه ف اعمار
حواريكى بطول لايام
غناويكى لساها عاشقه
العزف ع الاوتار
صبيه ماشيه تتمخطر
وياخد قلبى .. رنين خلخال
وامتى تعود ليالى زمان
اوعاكى ياخيتى تقولى خايفه
اوعاكى تقولى انا ماشيه ومش عارفه
اوعكى تكونى ضليتى السكه
اوعاكى تكونى نسيتى الفكرة
وخايف افكرك
تردى على : مش فاكرة
ومش دريانه مش حاسه
انا خايف يكون عمرك ضاع
وصار العمر لحظه
على فكرة .. انا راجع وراجعلك
وعاوز لما اجيكى ..
الاقيكى .. واقفه
وفاكرة
وشايفه
وحاسه
مستنيه لحظه
تطلعى من قلب الليل فرحة
تعلنى الفرحه
وانتى واقفه ..
والعشق من رحم المفاجأة
ليست هناك تعليقات:
إرسال تعليق