(وانزل لروحك حقلها )بقلم المبدع الأستاذ \ الشاعر وحيد راغب

(وانزل لروحك حقلها )
الفطيرة ..
مش بسمنة بل بدم
والعقيدة الخارجة توهة
للى جاع ملهوش مَرَمْ
إمتى تاكُل وانت صاحى
أو تشِم
شوف منارة ف وسط قلبك
يافطة ليك لما تبحَّر
واسأل الموج اللى غرَّق
قوم نوح
واسأل البرق اللى حرَّق
قوم هود
واسأل الجبل اللى حوَّط
قوم موسى
فوق رؤوسهم زى طير
خط سير العمر عندك

بين إديك
خلى بالك راح يطير
والمهمة اللى انت ليها
تقتِلك
ما انت قسِّمت الفلك
و انقسمت بين ذوات متبعترة
لاانت عارف تبقى نفسك
أو تكون ف ضلوع لغيرك
خط سيرك
حدِّدُه
وانزل لروحك حقلها
ف جولة حية للنجوم
أو ف قيعان البحار
كم قول لِّى أمة
لو كنت شاطر.. أو محار
إنت قطرة ف كون وسيع
لو تحاول ترسَى إنسَى
إن انت حاجة
لو كابرت راح تضيع
إنت مخلوق النطف
والنطف سر الإله
كرَّمك وانت المكابر
ناسى نفسك
واللى زيك
عمره تاه
الشاعر وحيد راغب