أنا مستبده بقلم الشاعر عبدالهادى غزال

انا مستبده
إياك في يوم تقولي لآ
أو حتي ترضيني بآه
كل واحد مننا جواه حاجات وجعاه
بلاش تقلب في الجروح ونوصل لمرحلة الندم
وكل واحد مننا في التاني يطلع منصدم
ونلاقي حياتنا زي حلم نتمني ما حلمناه 
ليه نعيش الحياه بالقلم والمسطره
ونتعامل بمليون وش وبكلمات متعطره
ونفترق في وسط الطريق
والحب بينا يموت بريئ
وأقول عليك كداب وتقول عليا متكبره 
وساعتها اقولك خلي بالك
إياك تفكر إني جاريه 
كسبتها بسيف من فوق حصانك
أو تفكر إني لعبه بابا جابها وأديهالك
أو طفله تايهه في وسط زحمه محتجالك
أو حرف علي هامش حياتك الآستيكه تمحهالك
أنا إنسانه لحم ودم وليا حقوق
مخلوقه من ضلعك إنت
مش كائن نازل من فوق
أنا النعيم اللي في الحياه
أنا بسمه فوق كل الشفاه
أنا ورده في بستان حياتك
أنا اللي راح واللي جاي
واللي باقي من ذكرياتك
لو لقيتك بساط محبه
هخرج عيوني وأهديهالك 
يبقا أنا كده مستبده
ده أنا السعاده اللي مكتوبالك

بقلم الشاعر عبدالهادي غزال