كل ابداع وانت طيب
أرضة واحدة
تكفى تنهى ألف شطرة
من ديوان
كان وكان
ألف ليلة
لفت الدنيا بجمالها
من أوربا
للسودان
احنا فين
لما يجلس فوق قصيدنا
عيار وشاطر
ألعبان
يركب الموجة اللى جاية
واللى رايحة
برده راكب
ابن آوى
وابن مركوب
الحيتان
المواهب مش شطارة
أو كصفقة
ف كف تاجر
كل ربحه
يشيل فى نقطة
من حروفنا
يجر شوفنا
للغيلان
كل ابداع وانت هامش
واللى فى الصفحة المزيف
والجبان
الفوارس
راح زمانها
آن أوانها
فأرة تلعب بين سطورنا
حاملة فيرس
للطاعون
جف ريقنا من صراخنا
والضباع وسط الماعون
بس لازم نشعل النيران
ف روما
مش نضيع وقتنا
ف قيل وزوما
كل ابداع وانت شارب
من ثقافة أمر واقع
والبراقع فوق عيونا
وفى خيالنا
والفضا مليان
زفير
كل جملة حروفها ناقصة
تبقى بور
والصور بلعت نيرانها
والعبير
اللى فاضل ع الصينية
الطباق وجناس بيلحس
نقطة ساقطة من كتاب
تمتمة كهنة بتسجد
للى ساكن ف اليباب
كل ابداع وانت فاكر
الزمن منخل بينخل
والدهب
عمر بريقه
ماينطفى تحت التراب
ـــــــــــــــــ
زوما : لعبة على النت
الشاعر وحيد راغب
ليست هناك تعليقات:
إرسال تعليق