(زى النهارده). ٢٥/يناير/٢٠١٧ بقلم الشاعر/محمد الشاذلى

(زى النهارده). ٢٥/يناير/٢٠١٧
#######################

زى النهارده من سنين.............................سته

قاموا الولاد يعدلوا الفرع اللى كان...... مايل

سنين طويله وكل العباد ................ساكته

بتصرخ بعلو الصوت و ساعات..... بتتحايل

ناس ما لا قيه اللضى و ناس عايمه ف الفته

و اللى ف و سطيهم ساكت يدوب........طايل

قوته بالعافيه ومزوى كده ............ف حته

مقضى يا دوبك يومه و من الهموم.... شايل

خايف على ولاده لو حد راح تجيله بالسكته

زى النهارده من سنين .....................سته

قاموا الولاد يعدلوا الفرع اللى كان.... مايل

دول مش عيال ابدا .......اسف دولم ابطال

شبابهم زى الاسود حتى البنات........ مغاوير

قاموا يشيلو ف ظلم .......عمال على بطال

وكان رأيهم واحد............. اللى بيجرى كتير

لازم بلدنا تنصلح و تكون ف احسن حال

و قامو ا على قلب و احد قصدهم تغيير

للحال بكل ما فبه حتى النظام........ يتشال

وكان الاتفاق واللقا جوه... ميدان التحرير

متعرفش مين مسلم ومين مسيحى ..أمال

فيه م الصعيد جايين .....وكمان من الدلتا

زى النهارده من سنين...........................سته

قاموا الولاد يعدلوا الفرع اللى كان.. مايل

و منهم شباب ياما مرجعتش تانى لبيتها

خدهم رصاص الغدر..... لا عقل ولا فهامه

زهور وقطفوها فى عز...................زهوتها

علشان كانوا طالبين عيش حريه و كرامه

راحت الولاد ببلاش ......راحت بحسرتها

لا تعدلت الاحوال ولا رجعوا .....بسلامه

و غيرهم ركب للموجه و قسموا التورته

والفرع بقى ملوى ....جيبها يارب جمايل

زى النهارده من سنين........................سته

قاموا الولاد يعدلوا الفرع اللى كان مايل

الشاعر/محمد الشاذلى